ШҚО бизнесі Ұлттық тауар каталогын енгізуді кейінге шегеруді сұрайды
Шығыс Қазақстан облысының Кәсіпкерлер палатасында Сауда кеңесінің отырысы өтіп, онда бөлшек сауда өкілдері, жеткізушілер мен дистрибьюторлар 2026 жылғы 1 қаңтардан бастап енгізілетін Ұлттық тауар каталогына (ҰТК) көшу мәселесін талқылады. Қатысушылар енгізу мерзімдері мен бизнеске ықтимал салдарына алаңдаушылық білдірді.
Талқылаудағы негізгі мәселелердің бірі - өндірушілер мен импорттаушылардың бүкіл тауар ассортиментін мемлекеттік бірыңғай базаға міндетті түрде енгізуі болды.
«Ассортимент өте үлкен. Ол үшін адамдар, уақыт және бағдарламалық қолдау қажет. Бизнес қаңтарға дейін барлық каталогты жүктеп үлгере алмайды деп ойлаймын, ал NTIN болмаса, сауда тоқтап қалады», - дейді Сауда кәсіпорындары қауымдастығының төрағасы Владимир Бердник.
Кәсіпкерлердің айтуынша, ҰТК-ға енгізілмеген тауар заңсыз айналымдағы тауар болып саналады. Мұндай жағдайда дүкендер оны жеткізушіге кері қайтаруға міндетті.
«Егер ол тез бұзылатын өнім болса - сүт, көкөніс, ет ше? Олар бұзылып кетеді. Залалды кім өтейді? Бұл мәселе әлі шешілген жоқ», - деп атап өтті үй жанындағы дүкендер желісінің иесі.
Отырыс қатысушылары сондай-ақ қосымша қаржылық жүктемеге назар аударды. NTIN-кодтарымен жұмыс істеу үшін сауда нүктелеріне кассалық аппараттарды жаңарту немесе қайта бағдарламалау қажет болады.
«Бір кассалық аппаратты жаңарту құны 120–150 мың теңгені құрайды. Шағын бөлшек сауда үшін бұл - үлкен шығын. 3–4 кассасы барлар үшін мүлдем көтере алмайтын қаржы», - деді Өскемендегі дүкен иесі.
Бизнес өкілдерінің айтуынша, бұл шығындар мемлекет тарапынан өтелмейді және толықтай кәсіпкерлердің өз мойнында қалады.
Отырыс қорытындысы бойынша кәсіпкерлер тауар нарығын цифрландыруды қолдайтындарын, алайда ҰТК-ны міндетті енгізу мерзімін кейінге шегеру қажет деп санайтындарын айтты.
«Біз цифрландыруға қарсы емеспіз. Бірақ оның талаптары шынайы болуы керек. Қазіргі мерзімдерде бизнес дайындалуға үлгермейді», - деп атап өтті Владимир Бердник.
ШҚО Кәсіпкерлер палатасы жиын барысында жинақталған ұсыныстарды әзірлеп, уәкілетті мемлекеттік органдарға жолдайтын болады.
Пікір қалдыру:
Пікірлер: